బంగాళాఖాతంలో అల్పపీడనం!ఏపీ వైపు వాయుగుండం..?
Neti Sakshyam - సాక్ష్యం షార్ట్ న్యూస్ / విజయవాడ : అమరావతి, జూన్ 27: బంగాళాఖాతంలో ఏర్పడనున్న అల్పపీడనం రానున్న రోజుల్లో మరింత బలపడి తీవ్ర వాయుగుండంగా మారే అవకాశాలపై వాతావరణ సంస్థలు అంచనాలు వెలువరించాయి. అయితే ఇది ఏ ప్రాంతం మీదుగా ప్రయాణిస్తుంది, ఎక్కడ తీరం దాటుతుంది, ఎంత తీవ్రతతో ప్రభావం చూపుతుందనే అంశాలపై ఇంకా స్పష్టత రావాల్సి ఉందని నిపుణులు పేర్కొంటున్నారు. భారత వాతావరణ శాఖ (IMD)తో పాటు గ్లోబల్ ఫోర్కాస్ట్ సిస్టమ్ (GFS), యూరోపియన్ సెంటర్ ఫర్ మిడ్-రేంజ్ వెదర్ ఫోర్కాస్ట్స్ (ECMWF) అంచనాల ప్రకారం, బంగాళాఖాతంలో ఏర్పడనున్న అల్పపీడనం పశ్చిమ-వాయువ్య దిశగా కదులుతూ బలపడే అవకాశం ఉంది. జూలై 5 నాటికి ఇది తీవ్ర వాయుగుండంగా మారే అవకాశాన్ని పరిశీలిస్తున్నాయి. అయితే ప్రస్తుతం అందుబాటులో ఉన్న అంచనాల ప్రకారం, అల్పపీడనం వాయుగుండంగా మారే అవకాశం సుమారు 30 శాతం మాత్రమే ఉందని వాతావరణ నిపుణులు పేర్కొంటున్నారు. కాబట్టి ప్రజలు అనవసర ఆందోళనకు గురికాకుండా, భారత వాతావరణ శాఖ విడుదల చేసే అధికారిక బులెటిన్లను అనుసరించాలని సూచిస్తున్నారు. ఇక ఈ వ్యవస్థ ప్రభావంతో ఆంధ్రప్రదేశ్లో విస్తృతంగా వర్షాలు కురిసే అవకాశముందని అంచనా. జూన్ నెలలో వర్షాభావంతో ఇబ్బందులు ఎదుర్కొన్న ఖరీఫ్ రైతులకు ఈ వర్షాలు ఊరటనిచ్చే అవకాశం ఉంది. ముఖ్యంగా మెట్ట ప్రాంతాల్లో సాగు పనులు వేగం పుంజుకునే అవకాశముండగా, భూగర్భ జలాలు కూడా పెరిగే అవకాశం ఉందని వ్యవసాయ నిపుణులు అభిప్రాయపడుతున్నారు. రానున్న రోజుల్లో అల్పపీడనం కదలికలు, తీవ్రతపై భారత వాతావరణ శాఖ మరిన్ని బులెటిన్లు విడుదల చేయనుంది. పరిస్థితులను నిరంతరం పరిశీలిస్తూ తాజా సమాచారం ఆధారంగా ప్రజలు అప్రమత్తంగా ఉండాలని అధికారులు సూచిస్తున్నారు.
Admin
Neti Sakshyam
మరిన్ని వార్తలు
Developed By :
